Ang mga peste nga insekto, balatian, hilamon, ilaga, kuhol kag mga pispis indi makapanubo sa patubas. Ang halit sang peste makita kon isa o magsobra pa sini nga mga peste ang magsugod na panghalit, makita sa Table 4, Table 5, and Table 6.

• Maggamit sang baridad nga resistensyado sa mga peste kag balatian nga masami ukon nagatuhaw permi sa lokalidad. Ang paggamit sang resistensyado nga baridad amo ang una nga depensa sa pagdumala sang mga peste kag nagasanto sa bayolohikal nga pagtapna.
  
  Ilisan ukon buslan ang baridad kada 2 tubtob 4 ka pagtanum para mapahinay ang pagdugang sang mga peste nga insekto kag balatian. Paagi sini mapunggan ang pagdamo sang mabaskog nga kagaw-kagaw kag mga peste nga insekto.
• Magtanum sang dululungan pagkatapos sang isa ka bulan nga makapahuway ang duta.
• Amligan ang mga abyan nga sapat-sapat. May madamo nga grupo sang mga abyan nga sapat-sapat sa palibot sang humayan kon wala nag gamit sang mga pestesidyo. Ang patarasak nga paggamit sang pestesidyo makatuga sang pagkaguba sang ecosystem (palibot sang humay) kag kadamuon sang peste kag sang abyan nga sapat-sapat. Ang pag amlig sa sini nga mga abyan nga sapat-sapat indi delikado, barato kag permanente. Halimbawa, ang laba sungo nga tibakla nagakaon sang itlog sang tamasok samtang ang damang nagakaon sang buto kag dalagku nga lukot-lukot kag waya-waya.
• Pagmonitor sang talamnan. Ang regular nga pagmonitor sa talamnan labi na kon gamay pa ang humay makabulig gid sa pagkilala sang mga posible nga maga atake nga peste. Sa masunson nga pag usisa sa kahimtangan sang talamnan,puede mapaiway ang pag atake sang balatian antes mag abot sa makahalalit nga kahimtangan. Subong man madapatan sang nagakaigo nga pagdumala ang pag atake sang peste.