Ang sabwag‐tanum nanginahanglan ug igong gidaghanon sa tubig, maayong gawasanan niini, maayong pag‐andam ug maayong pagkapatag sa yuta, ug maayo ang pagduamala sa sagbot. Kung mogamit sa sabwag‐tanum nga paagi para sa abot nga pang komersiyo, sunda ang binasa nga pamaagi sa direktang pagsabod.
1. Ihumol, buoton, ug isabod o isabwag ang binhi.
2. Palugdangon ang lapok human sa katapusang pagpatag ug ipahubas ang subrang tubig sa basakan. Himu‐an ug gagmay’ng kanal sa kilid sa mga pilapil aron mapasayon ang pagpatubig ug pagpahubas.
3. Alang sa tinudling nga pagsabod, mahimo nga mogamit ug “drum seeder”. Panahon sa ting‐init, mogamit ug pinaturok nga binhi ug isabod human sa katapusang pagsudlay ug pagpatag sa yuta.
4. Kung mogamit sa kinamot ug tinudling nga pamaagi sa pagsabod, maghimo ug mga tudling/linya pinaagi sa mga gamit nga hinimo
sa kahoy ( wooden templates/marker). Isabod ang mga pinaturok nga similya subay sa hinimo nga mga tudling o linya.
5. Bantayan ang bag‐ong sinabod nga similya gikan sa mga langgam, ilaga, ug uban pang mga dangan. Pagbutang ug paon sa ilaga palibot sa basakan (kung gikinahanglan).
6. Tulo ka adlaw human sa pagsabod, mag‐espray ug pamatay sagbot (pre‐emergence).
7. Patubigan ang basakan usa ka semana human sa pagsabod o pagsabwag.
Leave a Reply