Panaggapas
Nagapas ken nairik ti pagay iti
umiso a tiempo.
- No aggapas ken agirik iti umiso a tiempo, sigurado a napintas ti kalidad ti irik, nangina ti presio ken kaay-ayo dagiti aggatang. Ad-adu ti saan a natangkenan a binukel ken nababbaba ti milling recovery no nasapa unay a gapasen ti pagay.
- No met marpekan wenno naladaw unay a gapasen ti pagay, adu ti maregreg a binukel ken adu ti matumek no maipabayo.Adu pay ti mapukaw gapu ta kanen ti bao, billit/tumatayab ken insekto.
- Maapektaran ti apit ken kalidad ti irik no nasapa wenno naladaw ti panaggapas.
PANAGAMIRIS TI KEY CHECK
Gapasen ti pagay no natangkenanen ti apagkalima wenno 20% dagiti binukel iti puon ti dawa. Pis-iten ti binukel iti puon ti dawa tapno maammuan no natangkenanen.
REKOMENDASION TAPNO MAIPATUNGPAL TI KEY CHECK
- Iriken ti pagay saan a naladladaw ngem maysa nga aldaw kalpasan a nagapas no panagtutudo ken saan a naladladaw ngem dua nga aldaw no kalgaw.
- Aggapas no 20-25% ti kadam-eg (moisture content) ti binukel no panagtutudo ken 18-21% no kalgaw. Nasaysayaat no agusar iti grain moisture meter.
- Liklikan nga ipenpen ti ginapas iti nalablabes ngem maysa nga aldaw. Bumara ti penpen ket mabalin nga agbuot ken agngisit ti irik a mangibaba ti kalidad ti bagas.
- Nasken a kalkalainganna laeng ti kapardas ti panagpuligos ti drum iti treser (agarup 800 rpm). No napardas unay, adu ti maperdi wenno mabuksilan a bukel. No namayamay unay, adu ti saan a mairik.
